ДАПтын долбоору Кыргызстанда 50 миңдей адамды жумуш менен камсыз кылды
Бүгүн Эмгек, социалдык камсыздоо жана миграция министри Канат Сагынбаев БУУнун Дүйнөлүк азык-түлүк программасынын делегациясы менен жолугушуп, кызматташуунун келечектүү багыттарын талкуулады. Бул тууралуу министрликтен билдиришти.
Маалыматка ылайык, министр ДАПтын Кыргызстандагы социалдык программаларды ишке ашыруудагы салымын белгилеп, 2014–2027-жылдар аралыгында 166,2 млн АКШ долларын түзгөн долбоорлор аркылуу миңдеген жарандарга жардам көрсөтүлгөнүн айтып берди. Анын ичинде “эмгек үчүн азык-түлүк” долбоору менен 50 миңге жакын адам убактылуу жумуш менен камсыз болду.
Тараптар эмгек менен камсыз кылуу, чакан бизнести өнүктүрүү, азык-түлүк коопсуздугун жогорулатуу жана санарип чечимдерди киргизүү багыттарында кызматташууну улантууну макулдашты. Жолугушуунун жыйынтыгында жаңы биргелешкен долбоорлордун Кыргызстан элинин жашоо сапатын жакшыртууга өбөлгө түзөрүнө токтолушту.
