Араван менен Кара-Сууда пахта түшүмү эки эсеге көп болду
Акыркы үч жылда Араван жана Кара-Суу райондорунда кытай сортундагы пахталар эгилип, сууну үнөмдөө максатында тамчылатып сугаруу ыкмалары орнотулду. Натыйжада пахтанын түшүмдүүлүгү эки эсеге өскөн. Мурда 35-40 ц/га болсо, азыр 60-65 ц/га жетүүдө. Бул тууралуу Айыл чарба министрлигинен билдиришти.
2025-жылдын түшүмүнө кытайлык “Хунтай” компаниясынан 8 сорт келип, лабораториялык анализден өткөн. Алардын ичинен үч сорт – “Хунтай-6636”, “Хунтай-73” жана “Хунтай-Т 115” – эгүүгө уруксат алды. Бул сорттор жалпы 200 гектар аянтка эгилип, өндүрүштүк сыноодон өтүүдө.
Бул жылы пахта терүү иштери заманбап пахта жыйноочу комбайндар менен жүргүзүлүүдө. Эгерде кол менен терүүдө дыйкандар бир гектар пахтаны 3 күндө теришсе, азыр техника жардамы менен бир гектар пахта аянтын бир сааттын ичинде терүүгө мүмкүн. Мындан тышкары, бир саатта комбайн менен 17 тонна пахта түшүмүн жыйноого болот.
Бул демилге жергиликтүү дыйкандар үчүн түшүмдү көбөйтүп, ишти жеңилдетип, заманбап технологияларды кеңири колдонууга өбөлгө түздү.
