Мобилдик банкинг аркылуу сом менен акча которуу убактылуу комиссиясыз жүргүзүлөт
Улуттук банк коммерциялык банктарга жана төлөм уюмдарына улуттук валютада акча которуулар үчүн комиссия алууга тыюу салды. Бул тууралуу банктын токтомунда маалымдалат.
Ага ылайык, 2025-жылдын ноябрынан баштап 31-декабрга чейин мобилдик тиркемелер жана интернет-банкинг аркылуу жүргүзүлгөн сом менен жеке кардарлардын акча которуулары үчүн комиссия алынбайт. Банк билдиргендей, бул чаралар калктын бардык катмары үчүн банктык кызматтардын жеткиликтүүлүгүн камсыз кылууга жана банк секторунда санариптик технологияларды киргизүүнү тездетүүгө жардам берет.
Токтом расмий жарыялангандан бир айдан кийин, тактап айтканда 24-ноябрдан күчүнө кирет.
