Бишкекте 9 айда мыйзамсыз жарнамаларга 1,2 млн сом айып салынган
Бишкек шаарынын мэриясынын Жер пайдаланууну контролдоо башкармалыгы борбор калаада жарнамалык объектилерди көзөмөлдөөнү күчөтүп, дизайн-кодго туура келбеген конструкциялардан тазалоо иштерин улантууда. Бул тууралуу шаардык муниципалитеттен билдиришти.
Кечээ Ленин жана Биринчи Май райондорундагы рейдде, айрыкча Манас – Жибек Жолу проспектилери, Жаш гвардия бульвары жана Чүй проспектинин айрым бөлүктөрүндө дизайн-кодго туура келбеген жана уруксат документтери жок билборддор жана жарнамалар алынган. Биринчи Май районунда 7 протокол түзүлдү.
Жыйынтыгында жалпы 120 жарнамалык конструкция демонтаждалды. Иш-чара акимиат, муниципалдык инспекция жана Бишкек шаарынын Архитектура жана шаар куруу башкы башкармалыгы менен биргеликте өткөрүлдү.
2025-жылдын январь–сентябрь айларында Жер пайдаланууну контролдоо башкармалыгы жалпы 3 278 мыйзамсыз орнотулган жарнамалык конструкцияны демонтаждаган, ошондой эле 288 протокол түзүлүп, жалпы суммасы 1 235 000 сом болгон айыптар салынды.
