Бишкектин кайсыл аймактарында үй жаныбарларын кармоого болбойт?
Бүгүн Бишкек шаардык кеңешинин Турак жай коммуналдык чарбасы, транспорт, коммуникация жана экология боюнча туруктуу комиссиясынын жыйынында административдик-аймактык реформа алкагында Бишкекке бириктирилген калктуу пункттарда үй жаныбарларын кармоо маселеси каралды.
Комисся төрагасы Алымбек Бактыбаев шаардын Октябрь, Ленин райондорунда эл уйларды, жылкыларды кармарын жана шаар бийлиги алардын пикирин эске алган, албаганына кызыкты.
Вице-мэр Рамиз Алиев, Бишкектеги үй жаныбарларын жана канаттууларын кармоо эрежесин жөнгө салышарын билдирди.
Анын айтымында жаңы эрежелер долбоорунда малдарды, канатууларды короолордо кармоого уруксат берилген. Мисалы:
эки музоолуу уй жана эки бука;
3 айлык торопойлору менен бир чочко;
10 баш кой;
5 чоң түлкү;
10 коен, норка, кундуз;
50 башка чейин үй канатуулары.
Р. Алиев Бишкек шаарынын үй канатууларын багууга тыюу салынган борбордук бөлүгү аныкталганын билдирди. Ал территория Жибек Жолу, Жаш Гвардия, Бөкөнбаев, Ибраимов көчөлөрүнүн ортосу. Ага чейин шаардын борбордук бөлүгүн түндүк жагынан – Чоң Чүй каналына, түштүк жагынан – Масалиев, Токомбаев көчөлөрүнө, чыгыштан – Ауэзов, батыштан Алыкулов көчөлөрүнө чейин кеңейтүү сунушталып жаткан.
