Кыргызстан 6 түр азык-түлүк менен өзүн толук камсыздайт
Кыргызстанда 9 социалдык мааниге ээ азык-түлүктүн 6 түрү боюнча өзүн өзү толук камсыздайт. Алар: картошка, сүт, эт, жашылча-жемиштер, жумуртка жана кумшекер. Калган үч продукт – нан азыктары, өсүмдүк майы жана мөмө-жемиштер, айрым бөлүгү импорттун эсебинен камсыздалат. Бул тууралуу Айыл чарба министрлигинен билдиришти.
Маалыматка ылайык, 2024-жылдан тарта Кыргызстан кумшекерди толук өндүрө баштады, мурда ал дагы импорттон келчү. Эт боюнча өлкө уй жана кой эти менен 100% камсыздалат, тоок эти боюнча камсыздоо иштери активдүү жүргүзүлүүдө.
Эттин баасы коңшу өлкөлөрдө (Өзбекстан, Тажикстан) жогору болгондуктан, фермерлер аны экспорттоого аракет кылышкан. Бирок мамлекет эттин экспортуна тыюу салып, баасына көзөмөл киргизди. Ошондой эле, тоок жумурткасынын өндүрүшү өсүп, импортко тыюу салынды жана Кыргызстан жумуртканын ашыкча көлөмүн экспортко чыгара баштады. 2025-жылдын август-январь айларында 3,3 млн даана жумуртка экспорттолду.
Суу ресурстары, айыл чарба жана кайра иштетүү өнөр жайы министрлиги өлкөнүн азык-түлүк коопсуздугуна жооп берет жана учурда көлөм боюнча көйгөйлөр жок.
