Кыргызстан КМШнын эмгек жана социалдык коргоо кеңешинде тажрыйба бөлүштү
Бүгүн, Эмгек, социалдык камсыздоо жана миграция министринин орун басары Бакыт Дарманкул уулу КМШга мүчө мамлекеттердин 38-жыйынында видеоформатта өткөн Консультативдик кеңештин отурумунда сөз сүйлөдү. Бул тууралуу министрликтин маалымат кызматынан билдиришти.
Жыйынга КМШга мүчө өлкөлөрдүн эмгек жана социалдык ведомстволорунун, ошондой эле тиешелүү эл аралык уюмдардын өкүлдөрү катышты. Талкууга эмгек рыногун өнүктүрүү, социалдык программаларды ишке ашыруу, мамлекеттик кызматтарды санариптештирүү, эмгек шарттарын жакшыртуу жана калктын аяр катмарына колдоо көрсөтүү маселелери алынды.
Министрдин орун басары кызматташтыкты чыңдоо, татыктуу эмгекти илгерилетүү жана социалдык адилеттүүлүктү камсыздоо маанилүүлүгүн белгилеп, Кыргызстандын эмгек рыногун өнүктүрүү жана санариптик механизмдерди колдонуу боюнча иш-аракеттерин улантып жатканын маалымдады.
Жыйындын соңунда катышуучулар тажрыйба алмашууну жана биргелешкен демилгелерди координациялоону улантууну макулдашты.
