Өрт коопсуздугун сактабаган ишканаларга 9 айда 11,7 млн сом айып пул салынган
Өзгөчө кырдаалдар министрлигинин Өрттү көзөмөлдөө кызматы үстүбүздөгү жылдын 9 айында мамлекеттик жана жеке ишканаларда 6 595 текшерүү жүргүздү. Бул көрсөткүч 2024-жылдын ушул мезгилине салыштырмалуу 10%га көп. Бул тууралуу министрликтен билдиришти.
Текшерүүнүн жыйынтыгында 4 269 көрсөтмө берилген жана 588 административдик протоколдун негизинде 11,79 млн сом айып пул салынган. Айып пулдардын көлөмү өткөн жылга салыштырмалуу эки эсеге өскөн.
Өрттүн алдын алуу максатында 7 950 көрсөтмө, 3 898 эскертме баракчалары таратылып, 276 маалымат тиешелүү органдарга жөнөтүлгөн. Ошондой эле 4 457 өрт гидранты оңдоп-түзөөдөн өткөрүлүп, бузук абалдагы мекемелерге 1,5 млн сом айып пул салынды.
Соода түйүндөрүндө, базарларда жана коомдук тамактануу жайларында жүргүзүлгөн кошумча 163 текшерүүнүн жыйынтыгында өрт коопсуздук эрежелерин бузган субъекттерге 1,16 млн сом айып салынды. Бул көрсөткүч да өткөн жылга салыштырмалуу эки эсеге өскөн.
