Оштун Чапаев айылында 375 орундуу жаңы мектептин курулушу башталды
Ош облусунун Ноокат районуна караштуу Чапаев айылында 375 орундуу жаңы мектептин курулушу башталды. Бул тууралуу Курулуш министрлигинен билдиришти.
Долбоор республикалык бюджеттен каржыланып, Курулуш министрлигине караштуу Турак жай-жарандык курулуш департаменти тарабынан жүзөгө ашырылууда. Объекттин тендердик баасы – 239 миллион сом.
Жаңы мектеп башкы планга ылайык 2479,8 чарчы метр аянтты камтыйт жана беш блоктон турат. Курулуш иштери заманбап үлгүдөгү эки кабаттуу окуу корпусу жана спорт залы менен жүргүзүлөт. Азыркы учурда имараттын пайдубалы куюлду, жана курулуш иштери пландалган мөөнөттө улантылууда.
Жаңы мектеп аймактагы билим берүү тармагын өнүктүрүүгө, окуучуларга заманбап шарттарды түзүүгө жана спорттук мүмкүнчүлүктөрдү кеңейтүүгө багытталат.
