Кыргызстандын ветеринардык лабораториясы WOAH менен твиннинг-долбоорун баштайт
Суу ресурстары, айыл чарба жана кайра иштетүү өнөр жайы министрлигине караштуу Ветеринардык диагностика жана экспертиза борборунун директору Алмаз Жунушбаев Бүткүл дүйнөлүк жаныбарлардын саламаттыгын коргоо уюмунун (WOAH) башкы директору Эммануэль Субейран жана субрегионалдык өкүлү Мереке Тайтубаев менен жолугушту. Бул тууралуу Айыл чарба министрлигинен билдиришти.
Жолугушуу Швейцариянын Женева шаарында өткөн Биологиялык коркунучтарды азайтуу боюнча Глобалдык конференциянын алкагында уюштурулду.
Тараптар лабораториялык базаны чыңдоо жана вирусология тармагындагы көзөмөлдү күчөтүү максатында твиннинг-долбоорду ишке киргизүүгө макулдашышты. Долбоордо илимий кызматкерлердин жана адистердин алмашуусу, окутуу семинарлары, вирус изоляттарын мүнөздөө, молекулалык тестирлөө жана секвенирлөөнүн заманбап ыкмалары каралган.
Твиннинг-долбоор толугу менен WOAH тарабынан каржыланып, Кыргызстандын ветеринардык лабораторияларынын потенциалын жогорулатууну, улуттук биокоопсуздук системасын чыңдоону жана эл аралык кызматташууну кеңейтүүнү камсыз кылат. Анын ийгиликтүү ишке ашырылышы жаныбарлардын жугуштуу ооруларын алдын алуу жана көзөмөлдөөнүн сапатын жогорулатууга өбөлгө түзөт.
