Экологиялык талаптарды сактабаган "Бетон Стар" ЖЧКсына 103 миң сом айып салынды
Экологиялык жана техникалык көзөмөл кызматы Бишкек шаары жана Аламүдүн району боюнча "Бетон Стар" ЖЧКсына пландан тышкары текшерүү жүргүздү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Текшерүүнүн жыйынтыгында ишканада айлана-чөйрөнү коргоо, өндүрүштүк коопсуздук жана техникалык талаптар бузулгандыгы аныкталды. Атап айтканда, мыйзам бузуулар КРнын Укук бузуулар кодексинин төмөнкү беренелерине ылайык катталган:
- 211-берене — экологиялык талаптарды бузуу,
- 245-берене, бөлүм 3 — өндүрүштүк коопсуздук эрежелерин сактабагандык,
- 230-берене — тиешелүү уруксатсыз иш жүргүзүү,
- 209-берене — жер, суу жана аба ресурстарын булгагандык.
Натыйжада ишканага 4 протокол түзүлүп, жалпы 103 000 сом өлчөмүндө айып пул салынды.
Экологиялык жана техникалык көзөмөл кызматы ишканаларга жана уюмдарга экологиялык жана коопсуздук талаптарын сактоонун экономикалык маанисине көңүл бурууну эскертет. Мыйзамдардын аткарылышы – айлана-чөйрөнүн сакталуусу, жарандардын ден соолугу жана ишкананын туруктуу экономикалык ишмердүүлүгүнүн кепилдиги.
