Фермерлер кант кызылчасын өткөрүүдө онлайн кезекке тура алышат
Быйыл кант кызылчасын кабыл алуу пункттарында электрондук кезекке туруу системасы ишке киргизилди. Анын жардамы менен ар бир фермер өзүнө ыңгайлуу күндү онлайн тандап, түшүмүн тоскоолдуксуз тапшыра алат. Пункттардын өкүлдөрүнүн айтымында, мындай ыкма дыйкандар үчүн ыңгайлуу шарт түзүп, жүктү ташууда убакытты жана чыгымды үнөмдөөгө жардам берет.
Суу ресурстары, айыл чарба жана кайра иштетүү өнөр жайы министрлигинин маалыматы боюнча, 2025-жылдагы кант кызылчасын оруп-жыюу иштери республика боюнча 60%-70% жыйынтыкталып калды.
Кант кызылчасынын түшүмдүүлүгүнө караганда быйыл 2024-жылдагыдай эле кумшекерге болгон баа туруктуу сакталып, рынокто жетишсиздик жаралбайт деп күтүлүүдө.
Белгилей кетсек, 2025-жылдын 9 айынын жыйынтыгында өлкөнүн азык-түлүк коопсуздугун камсыз кылуу боюнча жүргүзүлгөн иштердин алкагында, негизги 9 социалдык мааниге ээ азык-түлүктүн ичинен Кыргызстан 6 түрү менен өзүн-өзү камсыздай алат. Алар: картошка, эт, сүт, жумуртка, жашылча-жемиштер жана кумшекер.
