Республика боюнча 182 машина-трактордук станция уюштурулду
Ар бир райондо агротехникалык кызмат көрсөтүүчү машина-трактордук станцияларды (МТС) түзүү планына ылайык, республикада жалпы 182 МТС уюштурулду. Алардын 62си муниципалдык, 120сы жеке менчик. Бул тууралуу Айыл чарба министрлигинен билдиришти.
2025-жылдын 10 айында республика боюнча 1 мамлекеттик, 2 муниципалдык жана 7 жеке менчик МТС ишке кирип, 2024-жылга салыштырганда 16%га өстү. Натыйжада 65 жаңы жумуш орду түзүлдү.
Сокулук районундагы “Кыргызмамасылтукумзавод” мамлекеттик ишканасынын базасында 2025-жылдын 9-январында мамлекеттик МТС ишке кирди. Ал айылдык товар өндүрүүчүлөргө агротехникалык жана механизациялык кызмат көрсөтөт.
Ошондой эле, Ысык-Көл облусунун Ак-Суу районундагы “Сельэнерго” ишканасынын базасында жаңы мамлекеттик МТС ачылууга даярданып жатат. Тендер аркылуу 50дөн ашык айыл чарба техникасы сатып алынып, алардын 20дан ашыгы алынган. МТСтин толук кандуу иштеши үчүн имараттарды оңдоо жана инфраструктураны жакшыртуу иштери жүрүп жатат. Ачылыш аземи 2025-жылдын 15-ноябрына белгиленген.
