Азия өнүктүрүү банкы билим берүү уюмдарын куруу жана модернизациялоого кызыкдар
Кесиптик билим берүү системасын өнүктүрүү маселесин Азия өнүктүрүү банкы менен Агартуу министрлигинин өкүлдөрү талкуулашты. Тараптар кесиптик-техникалык билим берүүнү өнүктүрүү, окутуунун сапатын жогорулатуу жана инклюзивдүү билим берүү чөйрөсүн түзүүгө арналган «Көндүмдөрдү өнүктүрүү системасын трансформациялоо программасы» тууралуу талкуу жүргүзүштү.
АӨБнин өкүлдөрү белгилегендей, негизги багыттардын бири коопсуздукка жана сейсмотуруктуулукка өзгөчө көңүл буруу менен билим берүү уюмдарын куруу жана модернизациялоо зарыл. Ошондой эле мүмкүнчүлүгү чектелген балдардын билим алуусу үчүн шарттарды түзүү программанын негизин түзөт. Мындан тышкары, долбоор педагогдор менен өндүрүштүк окутуунун чеберлеринин квалификациясын жогорулатуу чараларын жана мыкты тажрыйба борборлорун өнүктүрүүнү көздөйт.
Программанын ишке ашырылышы натыйжага негизделген RBL (Results-Based Lending) форматында жүргүзүлөт. Долбоор Агартуу министрлиги, Илим, жогорку билим берүү жана инновациялар министрлиги жана Эмгек, социалдык камсыздоо жана миграция министрлиги менен кызматташтыкта ишке ашырылмакчы.
