Кыргызстанда жаңы биометрикалык паспорттор колдонууга берилди
3-ноябрдан тарта Кыргызстанда 2025-жылкы биометрикалык жалпы жарандык паспорттор колдонууга берилди. Жаңы паспортту алуу ыктыярдуу негизде жүргүзүлөт, азыркы паспорттор мөөнөтү бүткөнгө чейин жарактуу бойдон калат.
Жаңы документтердин негизги максаттары: мамлекеттик желектин өзгөрүшүнө ылайыкташтыруу, улуттук өндүрүштү күчөтүү, чек арада коопсуздук деңгээлин жогорулатуу жана документтерди жасалмалоодон коргоо.
Президенттин иш башкармалыгынын маалыматына караганда, “Учкун” ААК эми паспортторду жана ID-карталарды толук циклинде чыгарууга мүмкүнчүлүк алды. Бул документтерге жаңы коргоо элементтери киргизилген жана жасалма колдонууга жол берилбейт.
“Жаңы паспорттор чек арадан өтүүнү эсепке алууну жакшыртат, мыйзамсыз миграция жана кылмыштуулук менен күрөштү күчөтөт, ошондой эле миграциялык көзөмөлдүн сапатын жогорулатат”, - деп белгиледи Каныбек Туманбаев.
Мындан сырткары, “Учкун” ААК чет мамлекеттер үчүн паспортторду да чыгарууга мүмкүнчүлүк алган, анын ичинде алгачкы партиясы Намибияга жөнөтүлгөн.
