Нарында 261 млн сомго үч кабаттуу мектеп курулууда
Курулуш министрлиги Нарын облусунун Кочкор районунда И.Арабаев атындагы мектептин курулуш иштерин жүргүзүп жатат. Бул тууралуу аталган министрликтин маалымат кызматынан билдиришти.
Долбоор республикалык бюджеттен каржыланып, жалпы суммасы 261 миллион сомду түзөт. “Т” формасындагы мектеп 500 окуучуга ылайыкталып, үч кабаттуу окуу корпусу жана спорт залынан турат. Жалпы аянты 4136 чарчы метр.
Курулуш 2023-жылдын ноябрында башталып, азыркы учурда 70 пайызга аткарылды. Мектептин курулушунун аякталышы жергиликтүү билим берүү инфраструктурасын чыңдоого чоң салым кошот.
