Бишкекте таштанды өрттөгөндөргө 2,38 млн сом айып пул салынды
Бишкек муниципалдык инспекциясы суук түшүү менен экологияны коргоо жана жылытуу мезгилинде мыйзам бузууларды алдын алуу чараларын күчөттү. Акыркы жумада шаарда унаа майларын, тиричилик таштандыларын жана башка тыюу салынган материалдарды өрттөө фактылары катталган.
Муниципалитеттен билдиришкендей, инспекция мончолордо, сауналарда, ишканаларда жана жеке менчик объектилерде рейддерди жүргүзүп, тигүү өндүрүшүнүн калдыктары, автоунаа майлары, боёк жана лак материалдарын, пластмасса жана резинаны өрттөө учурларын аныктады.
2025-жылдын башынан бери 148 рейд жүргүзүлүп, 231 экологиялык мыйзам бузуу катталып, жалпы 2 млн 383 миң 500 сом айып пул салынды.
Инспекция шаар тургундарын жылытуу үчүн майларды жана таштандыларды колдонбоого, жалбырактарды жана чөптөрдү өрттөөдөн алыс болууга чакырат. Кодекс боюнча мыйзам бузгандар административдик жоопкерчиликке тартылат.
