Кепилдик фонд ISO 9001:2015 стандарты боюнча байкоочу аудиттен ийгиликтүү өттү
2025-жылдын 15–16-октябрында «Кепилдик фонд» ААКсы эл аралык ISO 9001:2015 стандартынын талаптарына ылайык сапатты башкаруу тутумунун биринчи байкоочу аудитинен ийгиликтүү өттү.
Текшерүүнүн жыйынтыгында сертификаттын аракет мөөнөтү дагы бир жылга узартылды. Бул уюмдун ишмердүүлүгүнүн жогорку деңгээлде уюштурулганын, ички процесстердин натыйжалуулугун жана сапат принциптерине берилгендигин ырастайт.
Менеджмент системаларын сертификаттоо органы «CERT International» «Кепилдик фонд» ААКсынын жамаатын «Ишкер субъекттерине индивидуалдык жана портфельдик кепилдиктерди берүү» багыты боюнча аудиттен ийгиликтүү өткөнү менен куттуктап, жогорку башкаруу маданиятын жана сапат принциптерине берилгендигин белгиледи.
ISO 9001:2015 бул - эл аралык деңгээлде таанылган сапатты башкаруу стандарты. Ал ар кандай өлчөмдөгү жана тармактардагы уюмдарга өз ишмердүүлүгүн жакшыртууга, кардарлардын күтүүлөрүн канааттандырууга жана сапатты сактоого болгон берилгендигин көрсөтүүгө жардам берет.
