Кыргызстан инновациялык курулуш боюнча эл аралык кызматташтыкты кеңейтүүдө
6-7-ноябрда Кытайдын Пекин шаарында "Кытай – Борбор Азия 2025" аттуу эл аралык курулуш конференциясы болуп өттү. Иш-чарага Курулуш, архитектура жана турак жай-коммуналдык чарба министри Нурдан Орунтаев баштаган делегация катышты. Бул тууралуу ведомстводон билдиришти.
Конференцияга Кытай жана Борбор Азия өлкөлөрүнүн курулуш министрликтери, шаар куруу боюнча улуттук институттар, илимий борборлор, тармактык ассоциациялар жана компаниялар да катышышты.
Иш-чаранын жүрүшүндө министрлер жана алардын орун басарлары курулуш жана архитектура тармагындагы инновациялык технологияларды киргизүү, энергияны үнөмдөөчү шаарларды өнүктүрүү жана өнөр жайлык өнөктөштүктү кеңейтүү маселелерин талкуулашты.
Конференцияда илимий-техникалык кызматташтыкты чыңдоо, курулуш стандарттарын шайкеш келтирүү, “жашыл” курулуш долбоорлорун ишке ашыруу жана Пекин демилгесин илгерилетүү маселелерине өзгөчө көңүл бурулду.
Тараптар Пекин демилгеси узак мөөнөттүү өнөктөштүктүн негизи болуп, курулуш жана шаар куруу тармагындагы өз ара кызматташтыкты кеңейтүүгө өбөлгө түзөрүн белгилешти.
