9 айда 711 этникалык кыргыз кайрылман макамына ээ болду
2025-жылдын тогуз айында 711 этникалык кыргыз кайрылман макамына ээ болду. Эмгек, социалдык камсыздоо жана миграция министрлигинин маалыматына ылайык, эгемендүүлүк алынгандан бери Кыргызстанга 70 миңден ашуун этникалык кыргыздар көчүп келип, алардын ичинен 65 миңге жакыны өлкө жарандыгын алышкан.
Кайрылман макамы атайын түзүлгөн ведомстволор аралык комиссия тарабынан берилет. Анын курамына УМКК, ИИМ, Эмгек, социалдык камсыздоо жана миграция министрлигинин жана Санариптик өнүгүү министрлигине караштуу Калкты каттоо департаментинин өкүлдөрү кирет. 9 айдын ичинде кайрылман макамы төмөнкү өлкөлөрдөн келген этникалык кыргыздарга ыйгарылган:
Өзбекстан Республикасы — 54 адам;
Тажикстан Республикасы — 629 адам;
Кытай Эл Республикасы — 12 адам;
Россия Федерациясы — 7 адам;
Афганистан — 8 адам;
башка өлкөлөр — 1 адам.
Кайрылман күбөлүгү үч жылдык мөөнөткө берилет. Ушул убакыт аралыгында кайрылман макамынын ээлери Кыргыз Республикасынын жарандыгын алуу боюнча кайрылууга тийиш. Мындай макамга ээ болгон жарандар социалдык жөлөкпулга, пенсияга, медициналык жардамга, билим алууга жана Кыргызстандын аймагында эмгектенүүгө укук алышат.
