ИИМ шайлоочуларга мыйзамдуулукту сактоону эскертти
Ички иштер министрлиги 30-ноябрда өтүүчү Жогорку Кеңештин депутаттарын мөөнөтүнөн мурда шайлоо учурунда жарандарды мыйзамдуулукту сактоого чакырды. Бул тууралуу министрликтин маалымат кызматынан билдиришти.
ИИМ эскертет: шайлоочуларды сатып алуу, алардын эркин тандоосуна таасир этүү жана башка укукка каршы аракеттер кылмыш жоопкерчилигине алып келиши мүмкүн. Укук бузуулар тууралуу фактылар боюнча ички иштер органдарына кабарлоону өтүнөт.
Министрлик жергиликтүү өз алдынча башкаруу органдарынын өкүлдөрүн, үй комитеттерин, медицина жана билим берүү кызматкерлерин, калк менен тыгыз байланышта болгон бардык адамдарды шайлоо өнөктүгүнө аралашпоого жана административдик ресурстарды колдонбоого чакырды.
ИИМ жарандарды текшерилбеген маалыматтарды таратпоо жана шайлоо учурунда коомдук ишенимди сактоо маанилүү экенин белгилейт. Милиция саясаттан тышкары, анын негизги милдети — коомдук тартипти жана коопсуздукту камсыздоо, ар бир жарандын укуктарын коргоо болуп саналат,-деп айтылат маалыматта.
