Кыргызстан уй жана кой эти менен өзүн толук камсыздайт
Суу ресурстары, айыл чарба жана кайра иштетүү өнөр жайы министрлигинин маалыматы боюнча, Кыргызстан учурда уй жана кой эти боюнча ички рынокту толук камсыздай алат. Тоок эти болсо квота аркылуу импорттолот: 2025-жылы 58 миң тонна, 2026-жылы 48 миң тонна импорттолору күтүлүүдө.
Министрлик белгилегендей, уй жана кой этинин баасы боюнча мамлекеттик жөнгө салуу 2025-жылдын 31-декабрына чейин узартылган. Бул чара эт рыногунда баанын кескин көтөрүлүшүнө жол бербөө, ички рынокту турукташтыруу жана калктын социалдык аялуу катмарына жеткиликтүү болушун камсыздоо максатында кабыл алынган.
Азык-түлүк коопсуздугу бөлүмүнүн башчысы Уран Чекирбаевдин айтымында, дүйнөлүк жана ички инфляциянын жогорку деңгээлине байланыштуу бааны туруктуу кармоо боюнча кошумча чаралар көрүлүүдө. Учурда уй жана кой этинин баасы 600–700 сомдун тегерегинде, ал сакталууга аракет кылынууда.
Ошондой эле тирүү малдын экспорту токтотулуп, ички рынокто жетиштүү көлөмдө эт сунушталуусу камсыздалууда.
