Өсүмдүктөрдүн коопсуздугу үчүн 10 айда 40 миңден ашык экспертиза жүргүзүлгөн
Үстүбүздөгү жылдын январь-октябрь айларынын аралыгында Суу ресурстары, айыл чарба жана кайра иштетүү өнөр жайы министрлигине караштуу Өсүмдүктөрдүн карантини боюнча лабораториялар тарабынан 40 267 экспертиза жүргүзүлдү. Бул тууралуу министрликтин маалымат кызматынан билдиришти.
Маалыматка ылайык, карантиндик текшерүү жана анализ жүргүзүү үчүн лабораторияларга жалпысынан 18 703 даана үлгү тапшырылган. Алардын ичинен:
Импорттук продукциялардан – 7 820 үлгү;
Экспорттук продукциялардан – 5 954 үлгү;
Изилдөө иштеринен – 1 248 үлгү;
Жарандардын кайрылуулары боюнча – 525 үлгү;
Феромон тузактарынан алынган – 3 105 үлгү.
Жыйынтыгында жүргүзүлгөн экспертизалардын натыйжасында 16 түр карантиндик зыяндуу организмдер аныкталды.
Өсүмдүктөрдүн карантини — бул өсүмдүктөрдү жана айыл чарба продукцияларын ар түрдүү зыяндуу курт-кумурскалардан жана оорулардан коргоо максатында жүргүзүлүүчү көзөмөл чаралары. Бул иш-чаралар зыяндуу организмдердин өлкө аймагына кирүүсүн жана жайылышын алдын алууга багытталган.
Министрлик белгилегендей, өсүмдүктөрдүн карантиндик коопсуздугун камсыздоо иштери мындан ары да улантылат.
