Кара-Сууда 12,29 га жайыт жер мыйзамсыз бөлүштүрүлгөн
Милиция кызматкерлери тарабынан Кара-Суу районунун Баш-Булак айыл өкмөтүндө 12,29 гектар таза жайыттын мыйзамсыз бөлүштүрүлүшү боюнча кылмыш ишинин бети ачылды. Бул тууралуу Ички иштер министрлигинин маалымат кызматынан билдиришти.
Тергөөнүн маалыматына караганда, аталган жер трансформациядан өтпөсө да 27 жаранга 600 м²ден жеке турак жай куруу үчүн берилген. Бул иштерден мамлекетке 13 млн 770 миң сом өлчөмүндө зыян келтирилгени аныкталган.
Факт боюнча Кылмыш-жаза кодексинин 337-беренеси (Кызмат абалын кыянаттык менен пайдалануу) боюнча кылмыш иши козголду. Шектүүлөр катары Катта-Талдык айыл өкмөтүнүн мурдагы башчысы Ж.К., жер-адиси С.Б., жана мамлекеттик курулуш департаментинин түштүк региону боюнча адиси К.А. кармалды.
Азыркы учурда шектүүлөргө карата камакка алуу түрүндөгү бөгөт коюу чарасы тандалды. Учурда тергөө иштери улантылууда.
