КМШ омбудсмендери балдардын көйгөйлөрүн талкуулашты
13-ноябрда Минск шаарында (Беларусь) Көз карандысыз Мамлекеттер Шериктештигине (КМШ) катышкан мамлекеттердин балдардын укуктары боюнча ыйгарым укуктуу өкүлдөрүнүн комиссиясынын алтынчы отуруму болуп өттү. Ага КМШ өлкөлөрүнүн омбудсмендери, мамлекеттик органдардын жана мекемелердин өкүлдөрү, ошондой эле КМШнын Аткаруу комитетинин кызматкерлери катышты. Бул тууралуу өкмөттүн маалымат кызматы билдирди.
Кыргыз Республикасынын балдардын укуктары боюнча ыйгарым укуктуу өкүлү Асель Чынбаева мыйзам менен кагылышкан жашы жете электер менен иштөө багытындагы чаралар тууралуу баяндама жасады. Ал биринчи жолу анча оор эмес укук бузуу жасаган баланы кылмыш-жаза сот өндүрүшүнөн чыгаруу демилгеси тууралуу маалымат берди.
Отурум учурунда балдардын ресоциализациясы, коомго интеграциясы, кайыр сураган жана тентип жүргөн балдардын көйгөйлөрү, жетим жана ата-энесинин камкордугусуз калган балдарды үй-бүлөлүк түргө жайгаштыруу, ошондой эле балдардын эс алуусу жана ден соолугу тууралуу маселелер талкууланды.
