Сокулукта мыйзамсыз жыйналган 1425 кг эндик чөптүн тамыры аныкталды
Сокулук районунда мораторийге кирген эндик чөп мыйзамсыз жыйналып жатканын аныкташты. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Чүй регионалдык башкармалыгынын маалыматына ылайык, Торт-Күл айыл аймагында өткөрүлгөн биргелешкен рейд учурунда Почтовая көчөсүндөгү №77 үйдөн мораторийге кирген эндик өсүмдүктүн (макротомия) тамыры табылды. Жалпы салмагы 1425 килограммга жеткен чөп мыйзамсыз жыйналганы аныкталды.
Эндик чөп убактылуу мораторийге алынган өсүмдүк болуп, жыйналышы мыйзам менен чектелген. Табылган тамыр ошол үйдө жашаган жаранга таандык экени белгиленди. Ал Кытай жараны болуп, акыркы 10 жыл ичинде Кыргызстанда жашап жүргөн.
Мыйзамсыз чөп Сокулук райондук ички иштер бөлүмүнө өткөрүлүп берилди. Рейдге Жаратылыш ресурстары, экология жана техникалык көзөмөл министрлигинин Чүй регионалдык башкармалыгы, ЭТККнын инспекторлору жана УКМК кызматкерлери катышты.
