Майыптуулугу бар адамдарды колдогон "Биз биргебиз!" айлыгы башталды
Эмгек, социалдык камсыздоо жана миграция министрлиги "Биз биргебиз!" аттуу майыптуулугу бар адамдарды колдоо жана боорукерлик айлыгын жарыялады. Иш-чара 15-ноябрдан 15-декабрга чейин өтүп, 3-декабрда Эл аралык майыптуулугу бар адамдар күнүнө арналат.
Айлыктын негизги максаты – коомчулуктун көңүлүн мүмкүнчүлүгү чектелген жарандардын укуктарын коргоого буруп, алардын күнүмдүк турмушуна толук кандуу катышуусуна шарт түзүү, инклюзивдүү демилгелерди өнүктүрүү. Министрлик айлык учурунда бардык мамлекеттик органдарды, жергиликтүү бийликти, бизнес өкүлдөрүн жана жарандарды майыптыгы бар адамдарга көңүл бурууга жана колдоо көрсөтүүгө чакырат.
Маалымат үчүн: Эл аралык майыптуулугу бар адамдар күнү БУУнун Башкы Ассамблеясы тарабынан 1992-жылы бекитилген. Анын максаты – майыптыгы бар адамдардын укуктарын коомдук жашоонун бардык тармактарында илгерилетүү жана алардын күнүмдүк жашоодо туш болгон көйгөйлөрү тууралуу маалымдуулукту жогорулатуу.
Айлык – жөн гана иш-чаралар топтому эмес, ар бир адам өзүн керектүү жана корголгон сезген, инклюзивдүү коомду курууга багытталган маанилүү кадам экени айтылат маалыматта.
