Т.Шайназаров: үгүт эрежесин бузган жарандарга айып пул салынып жатат
Жогорку Кеңешке шайлоо өнөктүгүнүн айланасындагы соңку тенденциялар, үгүт кампаниясынын жүрүшү тууралуу Боршайкомдун төрагасы Тынчтык Шайназаров Би-Би-Сиге маек берген.
Анын айтымында мыйзам бузуулар тууралуу БШК маалыматты жарандардын кайрылууларынын негизинде, ошондой эле социалдык тармактарга чыккан маалыматтарга таянып чара көрүп жатат. Эреже бузуулардын көбү үгүт эрежелерине байланыштуу болууда. Айып пулдун алды жеке жактарга үчүн 7,5 миң сом, ал эми юридикалык тараптар 28 миң сомго чейин жетет.
Мурдагы шайлоолордон айырмаланып, бул ирет шайлоодо админресурс колдонулбастыгын билдирген төрага мамлекеттик кызматкерлерге ал түгүл лайк басууга тыюу салынгандыгын тастыктап, мындай аракеттердин болушун БШК гана эмес, жалпы коом көзөмөлдөш керектигин айтты.
“Аны Борбордук шайлоо комиссиясы жана кайдыгер карабаган жарандар көзөмөлдөйт. Эгерде ошондой фактылар аныкталган болсо, биз текшерүү жүргүзүп, андан кийин чара көрүп жатабыз. Бир мамлекеттик орган ушул багытта иш алып барып жатат деген жок. Шайлоону ачык, таза өткөрүү бир гана БШК эмес, бүт мамлекетттик органдардын милдети. Жарандардын да милдети болуш керек.” – деп билдирди Шайназаров.
