Токмокто 86 жыл мурда салынган эски оорукананын ордуна жаңы имарат курулат
Курулуш, архитектура жана турак жай-коммуналдык чарба министри Нурдан Орунтаев Чүй облусуна болгон иш сапарынын алкагында Токмок шаарына барып, мэр Алтынбек Эргешов менен биргеликте бир катар курулуш объектилерин карап чыкты.
Министрликтин маалыматы боюнча, Токмокто Дунларов көчөсү, 27 дарегиндеги эски оорукананын ордуна жаңы заманбап медициналык имарат курулат. Жугуштуу оорулар бөлүмү 892,4 м², кабыл алуу бөлүмү 160 м² аянтта курула турган болуп, “Кыргызкурулуш” мамлекеттик ишканасы бул долбоорду аткарат.
Жаңы оорукана эки блоктон турат жана дарыгерлер менен бейтаптар үчүн заманбап шарттар түзүлөт.
Эски ооруканын имараты (1939-жылы) 86 жылдан бери колдонулуп келет, ал эми жугуштуу оорулар жана кургак учук диспансери 1965-жылы курулган.
Министр Орунтаев бул долбоордун үстүндө ишти ыкчам бүтүрүүнү жана Токмокто медициналык инфраструктураны жаңылоону өзгөчө маанилүү деп эсептейт.
