Б.Төрөбаев: Айыл чарба кызматкерлери жоопкерчиликти күчөтүүгө тийиш
15-ноябрда Сокулук районундагы Кыргыз мамлекеттик асыл-тукум заводунда заманбап айыл чарба техникаларын тапшыруу аземи өттү. Иш-чарага Суу ресурстары, айыл чарба жана кайра иштетүү өнөр жайы министри Бакыт Төрөбаев катышты. Бул тууралуу министрликтин маалымат кызматынан билдиришти.
Министр Бакыт Төрөбаев кызматкерлерге кайрылып, айыл жергесинде жашаган калктын турмушун жакшыртуу кызматкерлердин негизги милдети экенин белгиледи: "60% элибиз айыл жергесинде жашайт. Аларга жер да, суу да, үрөн да, кайра иштетүү да, вакцина да керек. Ар кандай суроолор менен кайрылышат, биз ошол суроолордун баарына ак ниет менен мамиле кылып, жардам беришибиз керек", — деди Төрөбаев.
Ошондой эле ал кызматкерлерди дыйкандар менен карапайым адамдарга жоопкерчилик менен кызмат көрсөтүүгө чакырды: "Ким келбесин — дыйканбы же карапайым адамбы — кабыл алып, маселесин аягына чейин чечип бергиле. Шартка байланыштуу акча бере албай калсаңар да, банкка, долбоорлорго, агрохолдингдерге багыттап, толук колдоо көрсөтүү зарыл".
Министрдин айтымында, жөнөкөй элдин кирешеси көбөйсө, өлкөнүн маданияты, билими жана экономикасы да өсөт.
