Балдарды кылмыш жоопкерчилигинен чыгаруу процесси жөнгө салынды
Кыргыз Республикасынын балдардын укуктары боюнча ыйгарым укуктуу өкүлү Асел Чынбаева Башкы прокуратура уюштурган балдар адилеттигин камсыздоо боюнча тегерек столго катышты. Иш-чарага ЮНИСЕФтин Кыргызстандагы жетекчиси Самман Тапа жана бир катар мамлекеттик органдардын өкүлдөрү чакырылган. Бул тууралуу өкмөттүн басма сөз кызматынан билдиришти.
Катышуучулар мекемелер аралык өз ара аракеттенүүнүн актуалдуу маселелерин, өспүрүмдөрдүн укуктарын коргоо жана алдын алуу иштерин талкуулашты. Өзгөчө көңүл Президент Садыр Жапаров кол койгон Кылмыш-жаза кодексине жана Кылмыш-жаза процесстик кодексине киргизилген өзгөртүүлөргө бурулду. Алар балдарды кылмыш сот өндүрүшүнөн чыгаруу тартибин жакшыртууга багытталган.
Жыйынтыгында, мамлекеттик органдардын өз ара аракеттенүүсүнүн бирдиктүү жобосу иштелип чыгып, анын практикалык колдонуу жолдору талкууланды. Бул документ келечекте бардык кызматтардын ишин координациялоого жана өспүрүмдөрдүн укуктарын коргоого туруктуу жана бирдиктүү ыкма камсыздайт.
