Бишкек шаарында коллектордук-дренаждык тармактар тазаланууда
"Бишкек жашыл курулуш" муниципалдык ишканасы шаардагы коллектордук-дренаждык (КДТ) тармактарды тазалоо боюнча пландалган иштерди жүргүзүүдө. Тазалоо иштери кол менен жана атайын техникалар менен жүргүзүлүүдө. Бул тууралуу шаардык мэриядан билдиришти.
Шаар боюнча жалпы коллектордук-дренаждык тармактардын узундугу 80,6 км, анын ичинен ачык КДТ – 64 км, жабык КДТ – 16,6 км түзөт.
Эскертсек, тазалоо иштери жылына эки жолу, жаз жана күз айларында жүргүзүлөт. Негизги көңүл жер астындагы суулардын деңгээли жогору болгон аймактарга бурулуп, айрыкча Биринчи Май жана Свердлов райондорунун конуштарында каналдар үзгүлтүксүз тазаланат. Бул аймактарда ылай топтолуп, камыш өсүп кетүү учурлары көп кездешет, ал системанын кадимки иштешин камсыздоо үчүн үзгүлтүксүз тазалоону талап кылат.
Жабык КДТ тармактардын ишин негизинен жергиликтүү тургундардын мыйзамсыз кошулуп тиричилик калдыктарын агызуусу, дренаждык тармактардын үстүнө тосмолорду орнотуу жана кудуктардын капкактарын уурдоо кыйындатууда.
Муниципалдык ишкана шаар тургундарын ирригациялык тармактарга таштанды таштабоого, мүлккө аяр мамиле кылууга жана шаар кызматкерлеринин эмгегин урматтоого чакырат.
