Эмгек министрлиги: 8 миңден ашуун бош жумуш оруну бар
Быйылкы жылдын 10 айынын жыйынтыгы боюнча Кыргызстанда 8 миңден ашуун бош жумуш оруну бар. Бул тууралуу Эмгек, социалдык камсыздоо жана миграция министрлигинин адиси Садаткүл Мукамбетовага шилтеме берүү менен “Кабар” улуттук маалымат агенттиги билдирди.
Маалыматка ылайык, жумуш орундарына орношуу үчүн жарандар министрликке кайрылышы керек. Учурда чач тарач, ашпозчу, ширетүүчү, тигүүчү, бухгалтер, котормочу жана айдоочу кесиптеринесуроо-талап жогору.
Аталган кесиптер боюнча кыска мөөнөттүү окутуулар уюштурулуп, кесиптик лицейлер менен келишимдин негизинде жумуш издеген жарандар акысыз окутулат жана сертификат берилет. Окутуунун баасы 4600 сомду түзөт, бирок бул чыгымды мамлекет камсыз кылат. Ошондой эле мамлекет жол кире катары 360 сом төлөп берет.
Мындан тышкары, министрлик акы төлөнүүчү коомдук жумуштарды да караган. Анда иштеген жарандар орточо 1 миң 800 сом ала алышат. Садаткүл Мукамбетованын айтымында, бул сумма чоң болбосо да, мамлекеттин колдоосу катары каралат.
