Кеминде Архитектура башкармалыгынын жаңы имараты курулуп жатат
Курулуш, архитектура жана турак жай-коммуналдык чарба министри Нурдан Орунтаев Чүй облусуна болгон иш сапарынын алкагында Кемин райондук шаар куруу жана архитектура башкармалыгынын кызматкерлери менен жолугуп, алар иштеп жаткан эски имараттын абалы менен таанышты. Бул тууралуу министрликтин маалымат кызматынан билдиришти.
Министрдин айтымында, өлкө боюнча ведомствого караштуу бардык административдик имараттар акырындап жаңыланууда. “Буюрса, 2–3 айдын ичинде жаңы имаратта иштеп каласыздар. Эң башкысы – таза жана адилеттүү иштеңиздер”, — деди Нурдан Орунтаев.
Учурда кызматкерлер жайгашкан эски имарат Кемин шаарынын Ленин көчөсү 101 дарегинде турат. Жаңы административдик имарат ошол эле көчөдөгү 86В дарегинде курулууда. Долбоордо кызматкерлер жана жарандар үчүн бардык зарыл шарттар каралган. Жыйындар жана күтүү залы, архив, кабылдама, “бирдиктүү терезе” кызматы жана техникалык бөлмөлөр бар.
Азыркы учурда объектдин эскиздик долбоору толук даярдалып, котлован казуу иштери жүрүп жатат. Курулуш иштерин министрликке караштуу “Кыргызкурулуш” мамлекеттик ишканасы аткарууда.
Белгилей кетсек, жаңы административдик имараттар мамлекеттик бюджеттин эсебинен эмес, министрликтин ички ресурстарынын негизинде курулууда. Бүгүнкү күндө өлкө боюнча ондон ашык жаңы имараттын курулушу жүрүп жатат.
