Россия-кыргыз өнүктүрүү фонду менен айыл чарба тармагында кызматташтык талкууланды
Бүгүн, Суу ресурстары, айыл чарба жана кайра иштетүү өнөр жайы министрлигинде Россия-кыргыз өнүктүрүү фонду менен жолугушуу өткөрүлдү. Бул тууралуу министрликтин басма сөз кызматынан билдиришти.
Жолугушууга министрликтин жетекчилери жана фонддун башкаруу жана эксперттик курамы катышты.
Тараптар айыл чарба тармагындагы инвестициялар, кайра иштетүү өнөр жайын өнүктүрүү, кластердик мамилелерди жайылтуу жана мамлекеттик–жеке өнөктөштүк алкагында биргелешкен долбоорлорду ишке ашыруу мүмкүнчүлүктөрүн талкуулашты.
Россия-кыргыз өнүктүрүү фондунун өкүлдөрү инвестициялык-кредиттик колдоо, каржылоо көлөмү жана аймактык таралышы, приоритеттүү багыттар жана ири долбоорлор, ошондой эле техникалык жардам механизмдери тууралуу маалымат беришти.
Жолугушуунун жыйынтыгында министрлик менен фонддун ортосунда туруктуу кызматташтык үчүн жооптуу бөлүмдөр аныкталып, Меморандумдун долбоорун даярдоо тартиби белгиленди.
Ведомствонун маалыматына караганда, бул жолугушуу келечекте айыл чарба жана кайра иштетүү тармагында биргелешкен долбоорлорду ишке ашырууга жана инвестициялык чөйрөнү кеңейтүүгө багытталган.
