2026-жылдын 1-апрелинен баштап мугалимдердин айлык акысы жогорулайт
КРнын Президентинин тапшырмасына ылайык, 2026-жылдын 1-апрелинен баштап мугалимдердин, дээрлик бардык эле социалдык кызматкерлердин айлык акылары жогорулайт. Мындай билдирүүнү “Биринчи радионун” түз эфиринде Финансы министрлигинин штаттык бирдиктер жана маяналарды талдоо башкармалыгынын башчысы Нурадил Карыпбаев жарыялады.
Анын айтымында, республика боюнча мугалимдердин азыркы учурдагы орточо айлык акысы 26 миң сомдун тегерегинде турат, кийинки жылы 40 миң сомго чейин чыгат деп пландаштырылып жатат.
“Бүгүнкү күнү айлык акыны жогорулатуунун алдында эсептөө иштери жүрүп жатат. Мисалы, мугалимдердин билим даражасы, тажрыйбасы, окуткан класстары, берип жаткан сабагы, жашаган аймагына жана базалык ставкасына жараша айлык акылары аныкталат.” – деп билдирди Нурадил Карыпбаев.
Билдирүүгө караганда, акыркы жолу 2022-жылы жалпы бюджеттик мекемелерде эмгектенген социалдык кызматкерлердин айлык акысы 50 пайызга жогорулаган.
