Майыптыгы бар жарандар өндүрүшкө активдүү тартылууда
Эмгек, социалдык камсыздоо жана миграция министри Канат Сагынбаев Чүй облусунда майыптыгы бар жаштарды колдоого багытталган "Чүй облусунун жаш майыптар союзу" коомдук бирикмесинин ишмердүүлүгү менен таанышты. Бул тууралуу министрликтин басма сөз кызматынан маалымдашты.
Аталган уюм 2005-жылдан бери Чүй облусундагы 1600дөн ашуун майыптыгы бар жаранды бириктирип, билим алуу жана ишке орношуу мүмкүнчүлүктөрүн түзүп келет.
Бирикменин борборунда катышуучулар эмгек, чыгармачылык жана өз ара колдоо аркылуу активдүү коомдук жашоого аралаша алышат. Министр Сагынбаев уюмдагы ишке орноштуруу тажрыйбаларын жогору баалап, бул моделди башка аймактарга жайылтуу мүмкүнчүлүктөрүн карады.
Учурда бирикме мамлекеттик социалдык заказдын алкагында күч түзүмдөрүнө тигүү буюмдарын даярдап, туруктуу жумуш орундарын түзүүдө. Бул майыптыгы бар адамдардын эмгекке болгон кызыгуусун арттырып, туруктуу киреше табуусуна шарт түзүүдө.
"Бул тажрыйба туура уюштуруунун натыйжасында майыптыгы бар адамдар өндүрүштүк процесстерге толук кандуу тартылып, эмгек рыногунда ийгиликтүү атаандаша аларын айкын көрсөтүп турат", — деди министр Канат Сагынбаев.
