1-декабрдан тарта такси айдоочуларынын лицензиясы текшерилет

Жол кыймылынын коопсуздугун камсыздоо башкы башкармалыгынын маалыматына ылайык, 1-декабрдан тарта такси болуп иштеген айдоочулардын лиценциясы текшериле баштайт. Ал эми оң рулдуу унааларга такси болуп иштөөгө тыюу салынат.

Аталган башкармалык айдоочуларга такси болуп иштөө үчүн лицензияны өз убагында алууга чакырат. Болбосо 1-декабрдан тарта лицензиясы жокторго айып салынат. 

Лицензия алуу үчүн керектүү документтер:

– унааны каттоо жөнүндө күбөлүктүн, унааны башкаруу укугуна ишеним каттын көчүрмөсү;
– техникалык кароодон өткөндүгү жөнүндө актынын көчүрмөсү;
– ташуучунун жүргүнчүлөрдүн алдындагы жарандык жоопкерчилигин милдеттүү камсыздандыруу келишиминин көчүрмөсү;
– менчик укугунда же оперативдүү башкаруу укугунда автомобилдик транспорт каражаттарын күн сайын рейс алдында техникалык кароо жана айдоочуларды медициналык кароо үчүн өндүрүштүк-техникалык базасы бар юридикалык же жеке жактар менен түзүлгөн келишимдин көчүрмөсү;
– тиешелүү категориядагы айдоочулук күбөлүктүн көчүрмөсү, айдоочунун стажы үч жылдан кем эмес болушу керек;
– белгиленген формадагы ден соолуктун абалы жөнүндө медициналык маалымкат;
– соттуулугу жоктугу тууралуу маалымкат (оор жана анча оор эмес кылмыштар боюнча соттолгон жарандарга лицензия берилбейт).