Ири алдамчылыкка шектелген жарандар кармалды
Ички иштер министрлиги алдамчылыкка шектелген жарандарды колго түшурдү. ИИМдин басма сөз кызматынын маалыматына ылайык, жаран Д.М. арыз менен кайрылып, алдоо жолу менен анын ири өлчөмдөгү акча каражатын (5 500 000 сомун) ээлеп алган белгисиз адамдарга карата чара көрүүнү өтүнгөн.
Текшерүү учурунда белгисиз адамдар арыз ээсине телефон чалып, өздөрүн Бишкек шаарынын вице-мэри катары тааныштырып, андан соң “мэриянын кызматкери” делген адам менен байланышууну сунушташканы аныкталган.
Кийинчерээк, кайрадан телефон чалуу учурунда, кылмышкерлер өздөрүн УКМК кызматкерлери катары тааныштырып, жаранды адаштырып, анын банктык эсебинде турган акча каражаты террордук топту каржылоого которулганын билдиришкен. Каражаттардын сакталышын камсыздоо зарылдыгын айтып, алар арыз ээсин көрсөтүлгөн сумманы “коопсуз эсепке” деп аталган эсепке которууга көндүрүшкөн, андан кийин байланышты токтотушкан.
Бул факты боюнча Кыргыз Республикасынын Кылмыш-жаза кодексинин 209-беренесинде (Алдамчылык) каралган кылмыштын белгилери боюнча кылмыш иши козголгон.
ИИМдин кызматкерлери тарабынан жүргүзүлгөн ыкчам-издөө иш-чараларынын натыйжасында, 2001-жылы туулган М.Б., 2004-жылы туулган А.у.И. жана А.у.Н. кармалды. Шектүүлөргө карата камакка алуу түрүндөгү бөгөт коюу чарасы тандалды. Тергөө иштери уланууда.
