Таласта мыйзамсыз балык чарбаларына 122,6 миң сом доо коюлду
Талас облусунда Жерди жана сууну көзөмөлдөө боюнча кызматтын аймактык башкармалыгы Бакай-Ата жана Талас райондорунун прокуратуралары менен биргеликте балык чарбаларынын ишине мониторинг жүргүздү. Текшерүүнүн жүрүшүндө балык негизинен дренаждык сууларда өстүрүлүп жатканы белгилүү болду.
Адистердин айтымында, дренаждык суулар кышында тоңбогондуктан, балык өстүрүүгө ыңгайлуу көрүнгөнү менен, мыйзам боюнча мындай системаларда чарба жайгаштырууга тыюу салынат. КР Суу кодексине ылайык, суу ресурстары, дренаждык жана ирригациялык тармактар — мамлекеттин өзгөчө менчиги болуп саналат.
Мониторинг учурунда айыл өкмөттөр менен түзүлгөн айрым келишимдер мыйзамсыз экени аныкталды. Себеби дренаждык системаларды пайдаланууга айыл өкмөттөрүнүн укугу каралган эмес. Ошондой эле жайыт жерлеринде трансформациясыз берилген участоктордо топурактын түшүмдүү катмарын казуу фактылары катталып, тиешелүү эскертүү берилди.
Буга чейин аймактык башкармалык тарабынан эсептелген 122 673,6 сом өлчөмүндөгү доо Бакай-Ата райондук прокуратурасына өткөрүлгөн. Учурда 6 балык чарбасына карата мыйзамдуу чараларды көрүү боюнча иштер жүрүүдө.
