КабМин жаңы салыктык реформаны даярдап жатат. Эмне өзгөрөт?
Министрлер Кабинети салык системасын реформалоо боюнча жаңы токтом долбоорун коомдук талкууга чыгарды. Документ салыктык башкарууну түп-тамырынан өзгөртүп, көзөмөлдү күчөтүүнү, санариптештирүүнү жана салык органдарынын ыйгарым укуктарын кеңейтүүнү карайт.
Негизги өзгөрүүлөр кайсылар?
Видео көзөмөл (камералар)
Ишкерлер салык органдарына видеобайкоо системаларына жеткиликтүүлүк берүүгө милдеттендирилиши мүмкүн. Эгер камералар жок болсо, текшерүүчүлөр аларды өздөрү орнотушат. Бул маалыматтар текшерүүлөрдө жана мыйзам бузууларды аныктоодо колдонулат.
Рейддик текшерүүлөрдү күчөтүү
Салык кызматкерлери кызматкерлердин реалдуу санын, салыктардын жана камсыздандыруу төлөмдөрүнүн төлөнүшүн, кассалык аппараттарды жана санарип төлөмдөрдү колдонууну жана лицензиялардын болушун текшерүүгө кенен укук алышат. Бул көзөмөл такси, жеткирүү кызматтары жана онлайн-платформалар аркылуу иштеген башка сервистерге да жайылтылат.
Базарлар жана соода борборлорун көзөмөлдөө
Соода жайларынын администрациясына ижарачылардын салык тартибин көзөмөлдөө жана маалыматтарды мамлекетке берүү милдети жүктөлүшү мүмкүн. Мындай ыкма буга чейин ири базарларда сыноодон өтүп, кирешелердин өсүшүнө алып келгени айтылууда.
Жеңилдиктер жана мөөнөттөр
Айрым талаптар ишкерлерге ыңгайлашуу үчүн жылдырылды:
- кассалык аппараттар жана электрондук коштомо кагаздар боюнча айрым нормалар 2027-жылдын 1-июлуна чейин узартылат.
- агрегаторлор аркылуу иштеген такси жана курьерлер маалыматтарды салык системасына өткөргөн шартта кассалык аппарат колдонбошу мүмкүн.
Башка өзгөрүүлөр
Реформа товарларды маркировкалоо, жер казынасын пайдалануу жана “жашыл” экономика сыяктуу тармактарды да камтыйт. Ошондой эле эскирген айрым нормаларды жокко чыгаруу сунушталууда.
МинКаб реформанын максаты көмүскө экономиканы кыскартуу, ачык-айкындуулукту жогорулатуу жана салык башкарууну жөнөкөйлөтүү экенин белгилейт. Бирок айрым эксперттер бул чаралар бизнеске басымды күчөтүп, ишкерлер арасында талкуу жаратышы мүмкүн экенин айтышууда.
