АӨБ президенти Масато Канда Бишкектеги электробустарды көрүп чыкты

Азия өнүктүрүү банкынын (АӨБ) президенти Масато Канда Кыргыз Республикасына болгон иш сапарынын алкагында мэрдин орун басары Рамиз Алиев менен жолугушуп, "Бишкек шаардык транспорт" муниципалдык ишканасынын №2 автобекетине барды. Бул тууралуу Бишкек мэриясынан билдиришти.

Иш сапардын максаты — "Шаардык транспортту электрлештирүү" долбоорунун алкагында алынган электр автобустарынын техникалык мүмкүнчүлүктөрү жана инфраструктурасы менен таанышуу болду.

Иш-чаранын жүрүшүндө "Бишкек шаардык транспорт" муниципалдык ишканасынын директору Талант Капаров долбоор, анын негизги компоненттери жана ишке ашыруу абалы жөнүндө кеңири маалымат берди. ДЕПОнун курулуш этаптарынын сүрөттөрү, "Пилоттук жашыл коридордун" 3D-анимациясы жана электробустардын айдоочулары үчүн окутуу симуляциясы көрсөтүлдү.

Иш-чаранын жүрүшүндө делегация инфраструктура, кубаттоочу станциялар жана электробустарынын жаңы функциялары, анын ичинде ден соолугунун мүмкүнчүлүгү чектелүү жүргүнчүлөр үчүн түзүлгөн шарттар менен таанышты.

Иш-чара Азия өнүктүрүү банкынын өкүлдөрү жана долбоордун өнөктөштөрү менен биргеликте сүрөткө түшүү менен аяктады.