Бала бакчаларды каржылоо эми башкача жүргүзүлөт
МинКаб мектепке чейинки билим берүү мекемелерин нормативдик финансылоонун жаңы эрежелерин бекитти. Токтом бюджеттик каражаттарды пайдалануунун эффективдүүлүгүн жана мектепке чейинки билим берүү тармагындагы мамлекеттик саясатты ишке ашырууга багытталган.
Токтомго ылайык, бала бакчалардын чыгымдары бекитилген нормалардын негизинде эсептелет. Ошону менен бирге эмгек төлөмүнүн фонду нормативдерге кирбейт жана тарифтик тизмелер менен штаттык нөөмөткө жараша өзүнчө каржыланат.
Коммуналдык кызматтар дагы нормативдерге кирбей жергиликтүү же республикалык бюджеттин эсебинен төлөнөт.
Баланын канцеляриясы, гигиена каражаттары жана башка керектүү материалдар ата-энелер тарабынан төлөнөт. Бала бакчадагы бир күндүн баасын жергиликтүү органдар бала бакчалар менен биргеликте аныктайт жана каражаттар алардын эсебине түшөт. Ошондо бала бакчаларды каржылоо республикалык жана жергиликтүү бюджеттен, ошондой эле ата-энелердин каражаттарынан жүргүзүлөт.
Аталган документ типтүү нормативдер жайылтылбаган атайын бала бакчаларды, Билим берүү министрлигинин, Баткен облусунун, Бишкек шаарынын айрым мекемелерин жана мамлекеттик, күч структураларынын ведомстволук бала бакчаларын өзүнчө шарттайт.
