Бишкек мэриясы арзандатылган эт сатуу пунктун ачты
Эт азыктарынын кымбатташы социалдык көйгөйгө айлангандыктан, Бишкек мэриясы Монополияга каршы жөнгө салуу кызматы менен биргеликте базарлардагы абалга көзөмөлдү күчөттү. Бул иш-чаралар этке убактылуу мамлекеттик баа жөнгө салууну киргизүү тууралуу тиешелүү буйруктардын негизинде аткарылууда. Бул тууралуу мэриядан билдиришти.
20-ноябрда мэрдин биринчи орун басары М.К. Байгончоков жана Монополияга каршы жөнгө салуу кызматынын өкүлдөрү "Аламүдүн" жана "Ош базарында" рейд өткөрүштү. Текшерүүгө санитардык жана ветеринардык кызматтар, район администрацияларынын өкүлдөрү да катышты.
Ишкерлерге баанын чектерин сактоо милдети түшүндүрүлүп, мыйзам бузуу аныкталса чаралар көрүлөрү эскертилди.
Ошондой эле мэрия Ош базарында арзандатылган эт сатуу пунктун ачты. Бул жерде эт килограммына 660 сомдон жогору эмес баада сатылат.
Мэрия менен Монополияга каршы жөнгө салуу кызматы социалдык маанилүү азык-түлүктөрдүн баасын туруктуу кармоо боюнча мониторингди улантат.
