Сүлүктүдө жаштар үчүн жаңы маданий борбор ачылды
Сүлүктү шаарында жаштарды маданий жактан өнүктүрүү жана колдоо максатында жаңы маданий борбор ишке берилди. Борборго Билим берүүнүн мыктысы, маданиятка эмгек сиңирген кызматкер Увадат Сабурованын ысымы ыйгарылды, деп билдиришти Президенттин Баткен облусундагы өкүлчүлүгүнөн.
Курулуш 2023-жылы республикалык бюджеттен 50 млн сом жана жергиликтүү бюджеттен 12 млн сом бөлүнүп башталган. Борбордо азыр шаардык тарых музейи, борборлоштурулган китепкана, балдар китепканасы жана шаардык балдар искусство мектептери жайгаштырылды.
Маданият министрлиги тарабынан оргтехника, элдик аспаптар жана эмеректер берилсе, жергиликтүү бюджеттен улуттук кийимдер сатып алынган.
Ачылыш аземине президенттин өкүлү Айбек Шаменов, маданият, маалымат жана жаштар саясаты министринин орун басары Марат Тагаев жана Сүлүктү шаарынын мэри баштаган жергиликтүү жетекчилер катышты.
Борбор жаштарга маданий билим алуу, чыгармачылык менен алектенүү жана шаар турмушуна активдүү катышуу үчүн жаңы мүмкүнчүлүктөрдү берет.
