Дарыгерлердин маянасы 2026-жыл 50%га жогорулайт
2026-жылдын апрель айында дарыгерлердин жана саламаттык сактоо тармагында иштеген бардык кызматкерлердин айлык маянасы 50%га жогоруларын саламаттык сактоо министри Эркин Чечейбаев “Кабар подкаст” берүүсүндө билдирди.
Министрдин айтымында, мамлекеттик кирешелердин өсүшү мындай чечимди кабыл алууга мүмкүнчүлүк берген.
Азыр саламаттык сактоо кызматкерлеринин орточо маянасы 23 миң сомдун тегерегинде болсо, жогорулатылган соң 35-36 миң сомго чейин жетет. Ал эми тажрыйбасы жогору жана аймактарда иштеген айрым дарыгерлердин маянасы 100 миң сомго чейин чыгып калат”, - деди министр.
Буга улай министр Кыргызстандын саламаттык сактоо тармагында жакынкы 5 жылда бир катар ири реформалар жана долбоорлор ишке ашарын кошумчалады.
Министрдин айтымында, негизги долбоорлордун сап башында “Медициналык шаарча” долбоору турат. Ошондой эле министрликтин негизги максаттарынын бири –оорунун алдын алууга багытталган саясатты күчөтүү.
“Буга чейин тармак негизинен дарылоо менен гана алектенип келген. Эми болсо оорунун алдын алуу үчүн ресурстарды бир багытка топтоп, системалуу иштер жүргүзүлөт. Ошондой эле бүгүнкү күндө республика боюнча коомдук саламаттыкты сактоо боюнча алты ар башка уюм бар. Бирок, райондордо негизинен санитардык-эпидемиологиялык көзөмөл гана иштеп келет. Министрликтин максаты – бул уюмдарды бириктирип, эки негизги түзүмгө айландыруу жана алардын ресурстарын натыйжалуу пайдалануу”, - деп белгиледи ал.
