Кыргызстан абактарында завод, фабрикалар, тоок фермалар иштеп жатат
Кыргызстанда түрмөлөрдө дагы темирдей тартип орноп, абактагылар иш менен камсыз болгонун президенттин администрациясынын маалыматтык саясат кызматынын жетекчиси Дайырбек Орунбеков соцтармак аркылуу билдирди.
Анын айтымында, мурда соттолгондор 24 саат бою бош болуп, аларды мамлекет багып келген. Бирок, алардын баары "мыйзамдагы ууруга" баш ийишип, калгандары "мыйзамдагы ууруга" ай сайын акча жана ар кандай буюм-тайым чогултуп берип турушкан.
"Кыскасы, жалпы түрмөлөрдөн "мыйзамдагы уурунун" чөнтөгүнө ай сайын жүздөгөн миллиондор түшүп турган. Ошол себептен ал долларлык миллиардер болуп чыга келген.
Эми мамлекет ошол миллиарддарга түрмөдөгүлөрдүн өздөрүнө шарт түзүп берди”,-дейт Д.Орунбеков.
Буга улай ал түрмөлөрдүн ичинде завод-фабрикалар, тоок фермалары, мал баккан чарбалар иштеп, жер-жемиштерди өздөрү өстүрүп, тамак-ашын өздөрү таап, андан тышкары мамлекетке да киреше берип жатышканын жазган.
“Жаза мөөнөтүн өтөөчүлөр мурда үйлөрүнөн акча, тамак, кийим-кече сурап келишсе, азыр тескерисинче, үйлөрүнө акча жибере башташты. Себеби, баары бирдей иштешет, баарына бирдей шарттар түзүлдү. Кийимдери бекер, тамак күнүнө үч маал берилет. Мурда мындай болоору түштөрүнө да кирбейт эле. Мурдагыдай "сен байкушсуң, мен блатноймун" деген заман жок. Баары тең укуктуу, баары бирдей”,-деп жазат президенттин администрациясынын маалыматтык саясат кызматынын жетекчиси.
