Түптө 73,3 млн сомго мал чарба жана ветеринардык кызматтын жаңы имараты курулду
Бүгүн Ысык-Көл облусунун Түп районунда мал чарбасын өнүктүрүү, жайыт жана тоют кызматынын жаңы имараты расмий пайдаланууга берилди. Иш-чарага Айыл чарба, суу ресурстары жана кайра иштетүү өнөр жайы министри Бакыт Төрөбаев катышты. Бул тууралуу Айыл чарба министрлигинен кабарлады.
Эски имарат авариялык абалда болгон жана 1978-жылы курулган. Президент Садыр Жапаровдун тапшырмасы менен жаңы имаратка 73,3 млн сом бөлүнүп, курулуш аяктады. Эки кабаттуу имаратта кеңсе бөлмөлөрү, ветеринардык аптека жана архив жайгашкан.
Министр Төрөбаев белгилегендей, облус ветеринардык системасы толук иштеп, био-каражаттар менен камсыздалган, 1,8 млн баш малга эмдөө жана профилактика жүргүзүлдү. Малды идентификациялоо 139% аткарылып, 69 миң ири-мүйүздүү мал, 8 300 бал челектер жана 104 балык чарбасы СИОЖ системасына киргизилди. Ар бир райондук башкармалыкка «Нива» автоунаалары берилди.
Ошондой эле, Балыкчы шаарында өсүмдүктөрдүн карантини боюнча жаңы лабораториянын курулушубашталды. Долбоор Ислам өнүктүрүү банкы тарабынан каржыланып, жалпы бюджети 350 миң долларды түзөт.
