Бишкекте кыргыз-австрия жумушчу тобу инновациялык долбоорлорду талкуулады
Күн мурун Бишкек шаарында КРнын Жаратылыш ресурстары, экология жана техникалык көзөмөл министрлиги менен Австриянын Федералдык каржы министрлиги түзгөн Меморандумдун алкагында кыргыз-австриялык биргелешкен жумушчу топтун биринчи жыйыны болуп өттү.
Министрликтин маалыматына ылайык, жыйында тараптар тоо-кен тармагы, минералдык ресурстар жана инновациялык технологиялар боюнча кызматташтык багыттарын талкуулашты. Алдыңкы тажрыйбаны алмашуу, заманбап технологияларды киргизүү жана биргелешкен долбоорлорду даярдоо маселелери каралды. Мындан ары үзгүлтүксүз жолугушууларды өткөрүү менен кызматташтыкты тереңдетүү макулдашылды.
Кыргыз тарапты Жаратылыш ресурстары министрлигинин орун басары Жусупбеков Марат Мамбетович, Австрия делегациясын тоо-кен өнөр жайы боюнча жооптуу каржы министринин орун басары Андреас Райххардт баштап келди. Жыйында ошондой эле ири тоо-кен компаниялары жана лабораториялардын өкүлдөрү катышты.
Тараптар мыйзамдар, инвестициялык объекттер, сейрек кездешүүчү жер металлдарын алуу технологиялары жана кадрларды даярдоо боюнча кызматташтык маселелерин талкуулашып, келечекте конструктивдүү кызматташтыкты улантууга даяр экенин билдиришти.
