Мыйзамсыз курулуш объектилери аныкталып, 400 миң сом айып салынды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Чүй регионалдык башкармалыгынын инспекторлору Чүй облусундагы курулуш объектилерин көзөмөлдөнүүдө.
Курулуш министрлигинен билдиргендй, инспекторлор Аламүдүн райондук прокуратурасынын көрсөтмөсүнүн негизинде Кара-Жыгач айылындагы “Чопо-Таш” ЖЧКсы жана “Нурлион Бетон” ЖЧКсы тарабынан курулуп жаткан бетон түйүндөрүнө пландан тышкаркы текшерүү жүргүздү.
Текшерүүнүн жүрүшүндө аталган объектилерде талапка ылайык долбоордук-уруксат берүүчү документтердин жоктугу аныкталды. Ошондой эле, компетенттүү органдар менен зарыл болгон макулдашуулары жок экендиги маалым болду.
Натыйжада, административдик чаралар көрүлүп, “Чопо-Таш” ЖЧКсы жана “Нурлион Бетон” ЖЧКсынын ар бирине 200 000 сомдон, жалпы 400 000 сом өлчөмүндө айып пул салынды. Мындан сырткары, аныкталган бетон түйүндөрдүн иши мыйзам бузуулар толугу менен жоюлганга чейин токтотулду.
Кошумчалай кетсек, башкармалык тарабынан аталган факт боюнча өз алдынча курулган объектилерди бузуу жөнүндө сотко доо арызы да берилди.
